Risaeðlurnar komast á blað bandarískra verðlauna

Fyrsta bók Ævars Þórs Benediktssonar um bernskuberk hins geysivinsæla Ævar vísindamanns, Risaeðlur í Reykjavík, komst á dögunum á blað bandarískra verðlauna sem sérhæfa sig í vísindabókum fyrir börn. Verðlaunin nefnast „The DeBary´s Children´s Science Book Award“ (nefnd í höfuðið á vísindamanninum Heinrich Anton de Bary) og veita verðlaun fyrir bestu barnafræðibókina í tveimur flokkum; eldri og yngri.

Risaeðlur í Reykjavík hlaut ekki verðlaunin í þetta skiptið, en komst þó á blað sem ein af bestu bókum síðasta árs. Í tilkynningu sem samtökin APS sem halda utan um verðlaunin sendu frá sér kemur fram að þetta er í fyrsta skipti sem að verðlaunanefndin hefur tekið til greina alþjóðlega bók og að blessunarlega hafi fundist þrír gestadómarar sem gátu lesið íslensku og kannist við íslenska bókmenntahefð. Verðlaunanefndin hefur í framhaldi af þessu tekið þá ákvörðun að gera alþjóðlega bækur gjaldgengar til verðlaunanna.

Í umsögn dómnefndar segir meðal annars að Ævar og vinir hans hafi verið afar góður félagsskapur á meðan á lestrinum stóð og að teikningar Ránar Flygenring hafi verið bráðfyndnar. Þá hafi verið mun auðveldara og ekki nærri því eins ógeðslegt að lesa Risaeðlur í Reykjavík og íslensku víkingasögurnar. Síðustu orð umsagnarinnar eru að hér sé á ferðinni höfundur sem hreinlega verði að þýða á ensku. Bækurnar um bernskubrek Ævars vísindamanns koma út í tengslum við lestraráktökin sem Ævar hefur staðið fyrir undanfarin tvö ár en von er á þriðju bókinni nú í vor, sem ber heitið Gestir utan úr geimnum.

Áður hafa komið út fyrrnefnd Risaeðlur í Reykjavík og Vélmennaárásin sem báðar hafa hlotið einróma lof gagnrýnenda og leseanda og báðar orðið sannkallaðar metsölubækur. Auk þess var Vélmennaárásin tilnefnd til Íslensku bókmenntaverðlaunanna nú rétt fyrir jól.

Nýlegt
Archive

Skoðaðu!

© 2019 - Snorkur ehf

Teiknaðar myndir af Ævari 

eftir Rán Flygenring

HEFURÐU LESIÐ BÓK EFTIR ÆVAR?

GEFÐU HENNI EINKUNN Á

EINHVERJAR SPURNINGAR?